မီးဝၼ်းၼုိင်ႈမႄႈႁဝ်းလုၵ်ႉၸဵမ်ၸဝ်ႉ ပေႃႈႁဝ်းတႄႉလူင်းၼွၼ်းၼႃးၼႆဝႃႇ မူိဝ်ႈၼႆႉမႄႈႁဝ်းလုၵ်ႉႁုင်ၶဝ်ႈၸဵမ်ၸဝ်ႉသေႁွင်ႉၶႃႈၵိၼ်ၶဝ်ႈယူႇ
"ဢၢႆႈၸၢႆးမႃးဢဝ်ဝၼ်ႇၶဝ်ႈမႂ်းလႄႈမူိဝ်ႈၼႆႉၵဝ်တေဢွၼ်မႂ်းၵႂႃႇလႄႇ"
လႆႈငိၼ်းၵႂၢမ်းမႄႈလၢတ်ႈယဝ်ႉၸူမ်းတႄႉၸူမ်းဝႃႈသေလႅၼ်ႈၸူးမႄႈႁဝ်းယူႇ
"မႂ်းတေဢဝ်ၽၵ်းသင်" မႄႈႁဝ်းထမ် ၽၵ်းတႄႉမီးသွင်မီႇ ၽၵ်းၵုတ်ႇလႄႈၽၵ်းထူဝ်ႇ
"ၸၼ်မၼ်ၼမ်ႉၽၵ်းၵဝ်ၶႃႈလႄႈမႄႈတင်းၽၵ်းၵုတ်ႇႁေ"
"ႁူိဝ်ႇၵႂႃႇၵိၼ်ၼူိဝ်ၸၢၼ်းပုၼ်ႉလႄႈ ယႃႇဢွႆႇၵႆႇၼႃႈ"
ၶႃႈဢဝ်ဝၼ်ႇၶဝ်ႈဢၼ်မႄႈသႂ်ႇပၼ်ၼၼ်ႉသေ တင်းထွမ်ႇမႄႈလၢတ်ႈလႄႈပႆၵႂႃႇၼူိဝ်ၸၢၼ်းယူႇ
ဝႆးၵိၼ်ၶဝ်ႈယဝ်ႉမႄႈပႃးပႅမ်းတဵင်ႇသေ ဢဝ်ထူင်မၵ်ႇၵင်ႇၶႃႈလႄႈၸွၵ်းၶဝ်ႈဝၼ်းယူႇ
"ႁဝ်းတေၵႂႃႇလႂ်လႃႇမႄႈ"ၶႃႈထမ်
"တေၵႂႃႇၼႃးဢူိဝ်ႈ ၵဝ်တေဢွၼ်မႂ်းၵႂႃႇၵဵပ်းမၢၵ်ႇႁဵဝ်ႈၼႂ်းၼႃး"
လႆႈငိၼ်းမႄႈလၢတ်ႈယဝ်ႉၵေႃႈၸူမ်းသူိဝ်းၸႂ်တႄႉ ႁဝ်းၵေႃႈဢွၵ်ႇတီႈဝၼ်ႈသေပႆလူင်းၵႂႃႇတၢင်းႁင်ဝၼ်ႈပုၼ်ႉယူႇ တႃႇတေႁွတ်ႈၼႃးၼၼ်ႉဢမ်ႇၵႆၼႆဝႃႈမႄႈလၢတ်ႈ ၸႂ်ႈတႄႉၵႃႈႁဝ်းၵႂႃႇၵေႃႈဢမ်ႇတၼ်းႁူႉဝႃႈႁွတ်ႈၼႃးႁဝ်းၵွၼ်ႇ ၵွပ်ႈယၢမ်ႈမႃးပွၵ်ႈဢွၼ်တင်းသုတ်းလႄႈဢမ်ႇႁူႉဝႃႈၵႆၼၼ်ႉၼႃႇ
ဝႆးသေႁွတ်ႈၼႃးယဝ်ႉ မႄႈႁဝ်းဢဝ်ပႅမ်းမၼ်းဝႆႉတီႈထဵင်ၼႃႈႁဝ်းသေဢုပ်ႇၵၼ်တင်းဢူႈဢူႈယူႇ ႁဝ်းတႄႉႁွတ်ႈၼႃးယဝ်ႉၵေႃႈၶဝ်ႈၼႃးၵမ်းလဵဝ် ၵွပ်ႈၶႆႈၵိၼ်မၢၵ်ႇႁဵဝ်ႈသေတင်းၼုိင်ႈ ၵွပ်ႈၶႆႈဢႅၼ်ႇလဵၼ်ႈၼႂ်းၼႃးဢၼ်ထႆယဝ်ႉမႂ်ႇမႂ်ႇၼၼ်ႉၵေႃႈတင်းၼုိင်ႈလႄႈဢမ်ႇၵႂႃႇတီႈထဵင်
ၵဵပ်းၵႂႃႇၵဵပ်းမႃးမီးသဵင်သင်ၵေႃႈဢမ်ႇႁူႉ မေႃးမႃးတင်းၼူိဝ်ၾႃႉပုၼ်ႉႁႅၼ်တူၺ်းဢမ်ႇလၢတ်ႈၵေႃႈႁူႉၵမ်းလဵဝ်ဝႃႈပဵၼ်ႁူိဝ်းမိၼ် မၵ်ႇႁဵပ်းတႄႉဢမ်ႇပဵၼ်ၵဵပ်းယဝ်ႉလမ်းၸွမ်းတူၺ်းႁူိဝ်းမိၼ်တေႃႇပေႃးလပ်ႉၶဝ်ႈၶီႈၾႃႉၵႂႃႇ
ၵွပ်ႈၵုမ်ႇလမ်းၸွမ်းတူၺ်းႁူိဝ်းမိၼ်ၵူၺ်းလႄႈႁွတ်ႈထုိင်တီႈလႂ်ၵေႃႈဢမ်ႇႁူႉယဝ်ႉ ၵူၺ်းမုင်ႈႁၼ်ထဵင်ၼႃးႁဝ်းယူႇ
ၸုၵ်းယူႇတီႈတပ်ႈလွႆတီႈႁိမ်းၼႃးႁဝ်းၼၼ်ႉယူႇ လွမ်ႇမုင်ႈတူၺ်းတင်းၼုိင်ႈယဝ်ႉတင်းၼုိင်ႈယူႇ လႆႈႁၼ်ၽႆႇပုၼ်ႉလွႆမီးမွၵ်ႇၵွၼ်လႄႈတၢင်းႁင်ႈလီပႃႇထူိၼ်ႇယူႇ ၼႂ်းၸႂ်တႄႉၶႆႈၵႂႃႇလႄႇယူႇၵူၺ်းဢမ်ႇႁတ်း ၵွပ်ႈမႄႈႁဝ်းဝႃႈ"ယႃႇၵႂႃႇလႄႇၵႆ ၵူဝ်ပူႇပၢတ်ႇ"ၼႆလႄႈဢမ်ႇႁတ်းၵႂႃႇ
ဝႆးမႃးၼႃးပွၵ်ႈၼႆႉယဝ်ႉ ၵႆႉၵႆႉလႆႈမႃးၸွမ်းမႄႈႁဝ်းယူႇ ၵူၺ်းၶႆႈၵႂႃႇလႄႇၵႆၵႆသမ်ႉဢမ်ႇႁတ်းလႄႇတေႃႇဝၼ်းမူိဝ်ႈၼႆႉယဝ်ႉ ၵူဝ်ပူႇပၢတ်ႇ ႁဝ်းၵေႃႈဢမ်ႇယၢမ်ႈႁၼ်ၼင်ႇၵဝ်ႇၵူၺ်းမႄႈႁဝ်းလၢတ်ႈလႄႈယူဝ်တေမီးတေႉယူႇႁုိဝ်
ၵၢင်ၸႂ်တႄႉၶႆႈၵႂႃႇၽင်ႇၽၢႆႇပုၼ်ႉယူႇ "ၵွပ်ႈၵူဝ်မွၵ်ႇၵွၼ်ဝႆးပႅတ်ႈ"
0 comments:
Post a Comment